លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញកាន់បិណ្ឌវេនទី៤ ជាមួយលោកពូ លោកអ៊ំ លោកតានៃសមាគមមូលនិធិត្រីចក្រយានកម្ពុជា!!
ព័ត៌មានជាតិ
ដោយះ លោក សោ សិលា
ចេញផ្សាយថ្ងៃ ព្រហស្បត៍ ៥រោច ខែ ភទ្របទ ឆ្នាំ មមី អដ្ឋស័ក ពុទ្ទសករាជ ២៥៧០ ត្រូវនឹងថ្ងៃ ទី ០១ ខែ តុលា ឆ្នាំ ២០២៦
រាជធានីភ្នំពេញ៖
នៅព្រឹកថ្ងៃទី៣០ ខែកញ្ញា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមជាមួយនឹងលោកឪពុក អ្នកម្តាយ សហការី និងលោកពូ លោកអ៊ំ លោកតានៃសមាគមមូលនិធិត្រីចក្រយានកម្ពុជា ព្រមទាំងពុទ្ធបរិស័ទចំណុះជើងវត្ត អញ្ជើញកាន់វេនបិណ្ឌទី៤ នៃពិធីបុណ្យកាន់បិណ្ឌ នៅវត្តឧណ្ណាលោម ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ។
នៅថ្ងៃវេនបិណ្ឌទី៤ នៃពិធីបុណ្យកាន់បិណ្ឌនេះ លោកជំទាវបណ្ឌិត បាននាំយកទេយ្យទាន ចង្ហាន់ ភេសជ្ជៈ គ្រឿងឧបភោគបរិភោគ រួមទាំងបច្ច័យប្រគេនព្រះសង្ឃ និងបានបង្សុកូល រាប់បាត ដើម្បីឧទិ្ទសកុសលដល់ដួងវិញ្ញាណក្ខន្ធជីដូនជីតា ញាតិកាទាំង៧សន្តាន ដែលបានចែកឋានទៅ ដួងវិញ្ញាណក្ខន្ធវីរយុទ្ធជនដែលបានបូជាសាច់ស្រស់ឈាមស្រស់ការពារបូរណភាពទឹកដី និងប្រជាពលរដ្ឋដែលបានបាត់បង់ជីវិតក្នុងរបបប៉ុលពត។
សូមបញ្ជាក់ផងដែរថា ពិធីបុណ្យភ្ជុំបិណ្ឌ ឬ សម័យមុនហៅថា បុណ្យសែនដូនតា គឺជាពិធីបុណ្យប្រពៃណីជាតិខ្មែរដ៏ធំមួយតាំងពីសម័យអង្គរមកម្ល៉េះ ដែលមានរយៈពេល ១៥ថ្ងៃ គឺចាប់ពីថ្ងៃ ១រោច ខែភទ្របទ ដល់ថ្ងៃ ១៥រោច ខែភទ្របទ ។ ក្នុងវេលានេះ ប្រជាពលរដ្ឋខ្មែរគ្រប់ស្រទាប់វណ្ណៈសាមគ្គីគ្នា រួមគ្នាទៅបោះបាយបិណ្ឌ ធ្វើចង្ហាន់ រៀបចំទេយ្យទានប្រគេនព្រះសង្ឃគង់នៅឯវត្ត ដែលជាការឆ្លុះបញ្ចាំងយ៉ាងច្បាស់នូវការប្រណិប័តន៍សាសនាយ៉ាងខ្ជាប់ខ្ជួន ការនឹករលឹកដឹងគុណដល់ញាតិកា ចាស់ព្រឹទ្ធាចារ្យដែលបានចែកឋានទៅ ការនឹកគោរពដឹងគុណដល់បុព្វបុរស វីរយុទ្ធជនដែលពលីដើម្បីបុព្វហេតុជាតិ ជាពិសេសគឺការពង្រឹងស្មារតីសាមគ្គីជាតិតាមរយៈការជួបជុំគ្នានៅតាមភូមិស្រុក និងនាំគ្នាទៅវត្តធ្វើបុណ្យជាដើម៕
ដោយះ សមាគមសារព័ត៌មាន ឈុន ពេជ្រ ជាយដែន
https://www.cdv-news.com/
