សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ៖ជោគជ័យដ៏ធំបំផុត គឺការធ្វើសមាហរណកម្មកងទ័ពអតីតបួនភាគីមកនៅតែមួយភាគី និង ជាកងទ័ពជាតិតែមួយក្នុងប្រវត្តិសាស្ត្រកម្ពុជា !!!!
ដោយះ លោក ណាង រដ្ឋា
ចេញផ្សាយ ថ្ងៃ សុក្រ ២ រោច ខែ មិគសិរ ឆ្នាំ ថោះ បញ្ចស័ក ព.ស.២៥៦៧ ត្រូវនឹង ថ្ងៃទី ២៩ ខែ ធ្នូ ឆ្នាំ២០២៣
រាជធានីភ្នំពេញ៖
សម្រង់ប្រសាសន៍សំខាន់ៗរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុងពិធី «ខួបលើកទី ២៥ ទិវានយោបាយឈ្នះ ឈ្នះ និង
ខួប ៥ ឆ្នាំ នៃការកសាងវិមានឈ្នះ ឈ្នះ» នាព្រឹក ថ្ងៃសុក្រ ទី២៩ ខែធ្នូ ឆ្នាំ២០២៣៖
សម្តេចធិបតី បានមានប្រសាសន៍ថា ពិធីអបអរសាទរខួបលើកទី ២៥ នៃការបញ្ចប់សង្រ្គាមស៊ីវិលនៅកម្ពុជា និងការអនុវត្តប្រកបដោយជោគជ័យនៃនយោបាយឈ្នះ ឈ្នះរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងជាស្ថាបនិកនៃសុខសន្តិភាព គឺពិតជាមានអត្ថន័យជាប្រវត្តិសាស្រ្ត ដែលរំឭកនូវការបញ្ចប់សង្រ្គាមស៊ីវិលរ៊ាំរ៉ៃនៅកម្ពុជា និងការទទួលបានសុខសន្តិភាពពេញលេញទូទាំងផ្ទៃប្រទេស ដែលយើងមិនធ្លាប់មានក្នុងរយៈពេលជាង ៥០០ ឆ្នាំ ។ ក្នុងនេះ អ្វីដែលជាគន្លឹះពិតប្រាកដនៃជោគជ័យរបស់នយោបាយឈ្នះ ឈ្នះ គឺក្តីគោរព និងជំនឿទុកចិត្តរបស់គ្រប់តួអង្គពាក់ព័ន្ធ ចំពោះ សម្តេចតេជោ ពីព្រោះនយោបាយឈ្នះ ឈ្នះ មិនត្រូវបានធ្វើឡើងតាមរយៈកិច្ចព្រមព្រៀងណាមួយនោះឡើយ ប៉ុន្តែជាការធានាផ្ទាល់របស់ សម្តេចតេជោ ដែលគ្រប់តួអង្គពាក់ព័ន្ធមានភាពប្រាកដក្នុងចិត្តថា សម្តេចតេជោ ពិតជាអនុវត្តនូវគ្រប់ពាក្យសន្យាដែលបានធ្វើ ។ ជាមួយគ្នានេះ សម្តេចធិបតី ក៏បានសម្ដែងនូវការកោតសរសើរ និងមនោសញ្ចេតនាគោរពស្រឡាញ់យ៉ាងជ្រាលជ្រៅ ជូនចំពោះកងកម្លាំងប្រដាប់អាវុធជាតិកម្ពុជាទាំងអស់ ដែលបានគាំទ្រយ៉ាងពេញទំហឹងចំពោះ នយោបាយឈ្នះ ឈ្នះ របស់សម្តេចតេជោ ហ៊ុន សែន រហូតសម្រេចបានជោគជ័យដ៏ធំធេង, ដែលការណ៍នេះ បាននាំមកនូវសុខសន្តិភាពពេញលេញ និងការអភិវឌ្ឍលើគ្រប់វិស័យ ។
ក្នុងឱកាសនោះ សម្តេចធិបតី ក៏បានរំឭកបន្ថែមទៀតថា យើងបានបញ្ចប់សង្រ្គាមដ៏រ៊ាំរ៉ៃតាមរយៈនយោបាយឈ្នះ ឈ្នះ ដែលបាននាំមកនូវសន្តិភាព និងឯកភាពជាតិពេញលេញ និងឯកភាពទឹកដីទាំងស្រុង ចាប់ពីចុងឆ្នាំ១៩៩៨ មក ដោយមានយុទ្ធសាស្ត្រ DIFID ដែលជាយុទ្ធសាស្ត្រមួយក្នុងចំណោមយុទ្ធសាស្ត្រដទៃទៀត ដើម្បីឈានទៅរំលាយអង្គការចាត់តាំងនយោបាយ និង យោធារបស់ខ្មែរក្រហមទាំងស្រុង តាមរយៈការអនុវត្តនយោបាយឈ្នះ ឈ្នះ ជាមួយនឹងខ្លឹមសារស្នូលចំនួន ៣ ដូចខាងក្រោម ៖
ទី១. ការធានាអាយុជីវិត និង រូបកាយ ៖ នេះជាបញ្ហាដ៏មានសារៈសំខាន់បំផុតដែលអ្នកផ្ដាច់ខ្លួនចេញពីខ្មែរក្រហមមិនត្រូវទទួលបាននូវការចាប់ចង ឬ ការធ្វើទុក្ខបុកម្នេញរហូតទៅដល់ការសម្លាប់នោះទេ ។ ការណ៍នេះ គឺ ដើម្បីធានាថាអាយុជីវិត និង រូបកាយរបស់អ្នកផ្តាច់ខ្លួន មិនត្រូវបានទទួលការប៉ះពាល់ ។
ទី២. ការធានាអាជីព និង មុខរបរ ៖ ការធានាអាជីព និង មុខរបរ ត្រូវបញ្ជាក់អំពីអត្ថន័យរបស់វាបានច្បាស់ ។ រាជរដ្ឋាភិបាលបានរក្សាទុកទាំងអស់ ដោយគ្មានការរុះរើ គ្មានការដកហូតអាវុធ រាប់ទាំងរថក្រោះ ដោយរក្សាទុកទាំងរថក្រោះ កាំភ្លើងតូច/ធំ ទាំងអស់ គ្មានការរុះរើឡើយ ។ អ្នកធ្វើចៅហ្វាយស្រុក ចៅហ្វាយខេត្ត នៅបន្តធ្វើចៅហ្វាយស្រុក/ខេត្តតទៅទៀត, ប៉ុន្តែត្រូវអនុវត្តច្បាប់របសរាជរដ្ឋាភិបាល ។ អ្នកធ្លាប់ធ្វើគ្រូបង្រៀន ត្រូវបន្តធ្វើគ្រូបង្រៀនតទៅទៀត ប៉ុន្តែត្រូវដកកម្មវិធីសិក្សារបស់ខ្មែរក្រហមចេញ និង ដាក់កម្មវិធីសិក្សារបស់រាជរដ្ឋាភិបាលចូលជំនួសវិញ ។ អ្នកណាធ្លាប់ធ្វើអ្វី គឺធ្វើនោះវិញ ដោយគ្រាន់តែផ្លាស់ប្តូរឯកសណ្ឋានពីឯកសណ្ឋានរបស់ខ្មែរក្រហម ទៅជាឯកសណ្ឋានរបស់រាជរដ្ឋាភិបាល និង ពីការអនុវត្តកាតព្វកិច្ចរបស់ខ្មែរក្រហមវាយរាជរដ្ឋាភិបាល ទៅជាការអនុវត្តនូវកាតព្វកិច្ចរបស់រាជរដ្ឋាភិបាល ដើម្បីការពារទឹកដី ។
ទី៣. ការធានាកម្មសិទ្ធិ ទាំងចលនទ្រព្យ និង អចលនទ្រព្យ ៖ បងប្អូនមានអ្វី គឺ រក្សានោះ; មានដីធ្លីប៉ុន្មាន គឺរក្សាដីធ្លីនោះ; មានម៉ូតូ មានឡាន មានផ្ទះ គឺ រក្សាជាកម្មសិទ្ធិរបស់បងប្អូន ។
ជាមួយគ្នានេះផងដែរ សម្តេចធិបតី ក៏បានសង្កត់ធ្ងន់ផងដែរ អំពីផលប្រយោជន៍ពិតប្រាកដនៃនយោបាយឈ្នះ ឈ្នះ ដែលរួមមានជាអាទិ៍ ៖
ទី១. សង្គ្រាម, ជម្លោះប្រដាប់អាវុធ, ការស្លាប់ ឬ របួស ឬ ការព្រាត់ប្រាសដោយសារសង្គ្រាម ត្រូវបានបញ្ចប់ទាំងស្រុងរហូតដល់ពេលបច្ចុប្បន្ននេះ ។
ទី២. ជោគជ័យដ៏ធំបំផុត គឺការធ្វើសមាហរណកម្មកងទ័ពអតីតបួនភាគីមកនៅតែមួយភាគី និង ជាកងទ័ពជាតិតែមួយក្នុងប្រវត្តិសាស្ត្រកម្ពុជា ។
ទី៣. ការឯកភាពទឹកដីជាលើកដំបូងក្នុងប្រវត្តិសាស្ត្រដ៏យូរលង់របស់កម្ពុជា ។
ទី៤. ការប្រែក្លាយតំបន់អតីតសមរភូមិទាំងអស់ឱ្យក្លាយទៅជាតំបន់អភិវឌ្ឍន៍ ។
ទី៥. ការបញ្ចប់បានសង្គ្រាមបានចូលរួមចំណែកក្នុងការពង្រឹងសន្ដិភាពក្នុងតំបន់ និងចូលរួមដោះស្រាយកិច្ចការអន្ដរជាតិ ។
ទី៦. ការបញ្ចប់សង្គ្រាមនាំមកនូវវិនិយោគ និងទេសចរណ៍ ។
ទី៧. ការបញ្ចប់សង្គ្រាមនាំមកនូវការបង្រួបបង្រួមជាតិ ផ្ដល់ឱកាសមាស-ពេជ្រសម្រាប់ឱ្យយើងប្រមូលផ្ដុំកម្លាំងមនុស្ស, កម្លាំងប្រាជ្ញា, និង កម្លាំងទ្រព្យសម្បត្ដិ ដើម្បីអភិវឌ្ឍសង្គម-សេដ្ឋកិច្ច និង កាត់បន្ថយភាពក្រីក្រ ។
ទី៨. ជាមួយសន្តិភាព និង ដោយមានកិច្ចខិតខំប្រឹងប្រែងជាប្រចាំរបស់រាជរដ្ឋាភិបាល, កម្ពុជា បានបំពេញលក្ខខណ្ឌតម្រូវរបស់អង្គការសហប្រជាជាតិលើគ្រប់លក្ខខណ្ឌវិនិច្ឆ័យទាំងអស់ សម្រាប់ចាកចេញពីក្រុមប្រទេសមានការអភិវឌ្ឍតិចតួចនៅឆ្នាំ ២០២១ ។
ជាចុងក្រោយ សម្តេចធិបតី បានសង្កត់ធ្ងន់ថា បច្ចុប្បន្ន, កម្ពុជាកំពុងស្ថិតនៅលើមាគ៌ានៃការអភិវឌ្ឍប្រកបដោយក្ដីសង្ឃឹម, ក្លៀវក្លា, រឹងប៉ឹង, និង កាន់តែជឿជាក់ ។ សម្រាប់រយៈពេល ២៥ ឆ្នាំទៅមុខ ដែលជាវដ្តថ្មីនៃការអភិវឌ្ឍ, កម្ពុជាមានមហិច្ឆតាចង់លើកស្ទួយមោទនភាពជាតិ ឱ្យឈានកាន់តែខ្ពស់ឡើង តាមរយៈ ការកសាងជាតិមួយឱ្យរឹងមាំ, រស់រវើក, រុងរឿង និង មានវិបុលភាព ឆ្ពោះទៅសម្រេច ចក្ខុវិស័យកម្ពុជាក្លាយជាប្រទេសមានចំណូលខ្ពស់នៅត្រឹមឆ្នាំ ២០៥០ ៕
ដោយះ គេហទំព័រ សម្លេងជាយដែន
https://www.cdv-news.com/
